İstanbulda 7,0 bal gücündə zəlzələ nəticəsində 600 minə yaxın mənzil dağa bilər.
Bu barədə Türkiyənin ekologiya və şəhərsalma naziri Mehmet Özhaseki "A-Haber" telekanalının efirində bildirib.

Onun sözlərinə görə, İstanbulun təxminən 1,5 milyon mənzil fondu risk zonasına düşür: "7 bal və daha böyük zəlzələ zamanı 600.000 mənzil yer üzündən silinəcək”.
O qeyd edib ki, Türkiyə hakimiyyəti İstanbulda qəzalı vəziyyətdə olan mənzil fondunun köçürülməsi və zəlzələyə davamlı evlərin tikintisi üzrə işlər aparır. Ümumilikdə, təmir layihəsi çərçivəsində 300-350 min evin tikilməsi nəzərdə tutulur.

Qeyd edək ki, iyulun 19-da İstanbul rəhbərliyi mümkün dağıdıcı zəlzələ üçün hazırlıqlara başladığını elan edib. İyulun 12-də türk seysmoloq, İstanbul meriyasının Alimlər Şurasının üzvü Naci Gerur metropolun yerləşdiyi Mərmərə dənizi bölgəsində 7,2-7,6 bal gücündə təkanların olacağını proqnozlaşdırıb. Həmin bölgədə təxminən 17 milyon insan yaşayır. 2030-cu ilə qədər təbii fəlakət ehtimalı təxminən 50% təşkil edir.